大家成日食嘅黃金奇異果同綠色奇異果，係唔係都只知道金色奇異果貴啲好食啲，但除此之外好似又唔係幾講得出佢地兩種有咩分別？
其實小編之前都係，但原來佢地兩種奇異果都各有優點，已經幫大家整理好左，即睇以下內容就知道佢地嘅營養成份同埋邊一款先適合自己。

 

維他命C VS膳食纖維

 

一個黃金奇異果嘅維C含量對比一個綠色奇異果多出接近一倍，一日食一個金奇異果就可以攝取到每日所需嘅維他命C，想要更好美容養顏效果嘅朋友可以選擇食用黃金奇異果。

膳食纖維含量方面，綠色奇異果嘅表現則大大優於金色奇異果，綠色奇異果嘅膳食纖維含量高出黃金奇異果1.5倍，1個綠色奇異果嘅膳食纖維含量超過2隻香蕉，有助加快腸胃蠕動、改善便秘、延緩血糖上升、延長胃排空時間，並提升飽足感，有效減少攝食從而控制體重。

 

口感方面

 

黃金奇異果嘅口感比綠色奇異果黎講更加細膩綿密，少「渣」，而且黃金奇異果嘅味道更甜，因為黃金奇異果嘅果糖含量高，相同分量嘅果糖甜度係白砂糖嘅6倍，但因為係天然嘅果糖所以對血糖嘅影響唔大，可以放心食用。

綠色奇異果嘅口感相會比較粗糙，有「渣」，食起黎有酸酸甜甜嘅滋味，果糖含量低於黃金奇異果。

 

咁點樣揀選優質嘅奇異果？

無論係邊一個品種，喺出面購買奇異果時，記得揀頭部尖尖哋嘅，似小雞嘴巴形狀嘅奇異果，千奇唔好揀扁如鴨嘴嘅奇異果，因為扁狀嘅奇異果極大部分都係用咗激素，尖狀係無用過或者少用激素。

選擇外皮顏色略深嘅果實，呢樣係日照充足嘅象征，味道更甜。熟透嘅奇異果會好軟，存放期短，所以最好買手感略硬嘅奇異果，香蕉係天然嘅催熟劑，將奇異果同香蕉擺埋入同一個膠袋，可以加快水果成熟嘅時間。